શંભુ શરણે પડી

શંભુ  શરણે પડી માગું ઘડી રે ઘડી કષ્ટ કાપો

દયા કરી દર્શન શિવ આપો

તમો ભક્તો ના ભય હરનારા

શુભ સૌનું સદા કરનારા

હું છું મંદમતિ તારી ગહન ગતિ

કષ્ટ કાપો --------દયા કરી

અંગે ભસ્મ સ્મશાનની ચોળી

સંગે રાખો સદા ભૂત ટોળી

ભાલે તિલક કરી કંઠે વિષ ધરી

અમૃત આપો --------દયા કરી  

નેતિ નેતિ જ્યાં વેદ કહે છે

મારું ચિતડું ત્યાં જાવા ચાહે છે

સારા જગમાં છે તું વસુ તારામાં હું

શક્તિ આપો --------દયા કરી

હું તો એકલ પંથી પ્રવાસી

છતા આતમ કેમ ઉદાસી

થાક્યો મથી રે મથી કારણ જડતું નથી

સમજણ આપો ------દયા કરી

આપો દ્રષ્ટિમાં તેજ અનોખું

સારી સૃષ્ટિમાં શિવ રૂપ રૂપ દેખું

મારા મન માં વસો આવી હૈયે વસો

શાંતિ સ્થાપો ----------દયા કરી

ભોળા શંકર ભવ દુઃખ કાપો

નિત્ય સેવા નું શુભ ધન આપો

ટાળો માન સદા ગાળો ગર્વ સદા

ભક્તિ આપો --------દયા કરી